Айар дьиэҕэ сүрдээх истиҥ, «Айылҕаттан кэрэ дууһалаах күндү аҕабыт» диэн, оҕону ыччаты иитиигэ дьоһун кылаатын киллэрбит, ытыктыыр – убаастыыр киһибит Алексей Алексеевич Максимов сырдык кэриэһигэр, 75 сааһыгар анаан тахсыбыт кинигэ сүрэхтэниитин дьоро киэһэтэ буолан ааста. Алексей Алексеевич үөрэххэ, үлэҕэ ситиһиилэрин иһин “Методист учуутал”, “ Саха Өрөспүүбүлүкэтин үөрэҕириитин туйгуна “, “ Үөрэҕирии бэтэрээнэ» бэлиэлэр хаһаайыннара. Эбээн Бытантай улууһун сайдыытыгар үлэтинэн – хамнаһынан, олохтоох толкуйунан улахан кылаатын киллэрэн улуус бочуоттаах олохтооҕо, СӨ муниципальнай сулууспатын иккис кылаастаах советнига.
“ Киһи олоҕо олус кылгас. Ону сөптөөхтүк, сиэрдээхтик олорон, айымньылаахтык, таһаарыылаахтык үлэлээн барыы – ол дьол буолар. Биһиги күндү тапталлаах кэргэним, аҕабыт, эһэбит кылгастык, ол эрэн бу орто дойдуга биһиэхэ хаһан да умнуллубат өйдөбүл хаалларан барда. Кини күүстээх таптала, сырдык мичээрэ, олоххо тардыһыыта өрүү холобур буола туруо. Араас салайар үлэҕэ үлэлээн, дьон ытыктабылын ылбыта. Өссө да элбэх былааннаах, үгүс санаалардаах этэ. Сиппэтэх дьыалатын, ситэ олорботох олоҕун биһиги салҕыахпыт диэн, бу кинигэ таһааттардыбыт. Оҕолоро, аймахтара, коллегалара, табаарыстара, үөрэппит ыччата -бары санаабытын суруйан, өйдөбүнньүк хаартыскалары киллэрэн, киэҥ эйгэҕэ таһаардыбыт, — диэн олоҕун аргыһа, тапталлаах кэргэнэ Наталья Васильевна Максимова кинигэ аан тылыгар кэпсиир.
Айылҕаттан ураты билиилээх, мындыр киэҥ көрүүлээх, сырдык ыраас майгылаах Алексей Алексеевиһы улууска бука диэн бары бэрткэ өйдүүбүт. Кини ис иһиттэн бары өттүнэн интеллигентнэй, кыыһыра өһөрө сылдьыбат, хас биирдии оҕоҕо истиҥ сыһыан олохтуур дьиҥнээх Учуутал киһи этэ. Ол курдук, сырдык киһиэхэ анаммыт дьоро киэһэ олус истиҥ, сылаас быһыыга буолла. Манна кинини кытта үлэлээбит кэллиэгэлэрэ, үөрэнээччилэрэ кэлэн ахтан – санаан аастылар. Түгэһиир нэһилиэгин баһылыга Сергей Аликов эҕэрдэ тылын тиэртэ. Үөрэппит оҕолоро бэрт истиҥник санаан – ахтан аастылар. Дьоро киэһэни кииннэммит бибилэтиэкэ үлэһитэ Тамара Слепцова иилээн ыытта. Нюргун Боярскай, Мария Аммосова, Алексей Алексеевич сиэнэ Лейла Максимова ыллам ырыаларын бэлэхтээтилэр.