Биир дойдулаахтарбыт олохторун суолун батыһан Сахабыт сирин араас муннуктарыгар олороллор. Ситиһиилээхтик үлэлии – хамсыы сылдьалларын истэн бэрткэ диэн сэргиибит уонна сырдатабыт. Бу күннэргэ, ол эбэтэр сэтинньи 9 күнүгэр өрөспүүбүлүкэбит биир саамай улахан ускуустубатын уораҕайыгар – Былатыан Ойуунускай аатынан Саха Академическай тыйаатырыгар хоту сир кэрэ – мааны Далбара — Изабелла Максимова туруоруутугар «Оҕо суола” историческай драма көстүөҕэ. Бу сүрдээх дириҥ ис хоһоонноох, Аҕа дойду сэриитин сылларын саҕана оҕо дьиэтин иитиллээччилэрин ахтыыларыгар олоҕурбут, дьиҥ олох чахчыларынан историческай драма.
Биһиги Изабелла Александровнаны кытары төлөпүөн нөҥүө кэпсэттибит.
- Мин билигин Бэрдьигэстээхтээҕи Оҕо ускуустубатын оскуолатыгар тыйаатыр салаатын преподавательынан үлэлии сылдьабын, «Дебют» диэн студиялаахпын. Маны сэргэ эбии, сынньалаҥ киинигэр уус-уран салайааччынан үлэлиибин. Бэйэм Саккырыырга улааппытым, кыра эрдэхпиттэн үҥкүү кэрэ алыбыгар уйдаран, дьарыктанан оскуоланы бүтэрэрбэр идэбин култуура эйгэтин кытары ситимниирим саарбаҕа суоҕа. Дойдубар хореографтаабытым, кэргэн тахсан билигин Горнай улууһугар олоробун. Кэтэхтэн АГиКи – ны бүтэрбитим, тыйаатыр эйгэтин олус диэн сөбүлүүбүн, бу чахчы миэнэ эбит диэн санаа бигэтик дууһабар олорор. Бу испиктээкпинэн Таатта улууһун Ытык Күөлүгэр саас кулун тутар ыйга күрэххэ кыттыбыпыт. Манна өрөспүүбүлүкэ араас муннуктарыттан 31 тыйаатыр кэлэктииптэрэ кыттыбыттара. Биһиги бу бэйэлээх тыҥааһыннаах күрэһи ааһан, кыайаммыт Гран-при үрдүк ааты ылан үөрэн – көтөн, салҕыы айарга – тутарга кыннат анньынан кэлбиппит. Испиктээкпит Улуу Кыайыы 80 сыллаах өрөгөйдөөх үбүлүөйүгэр ананар. Кылгастык ис хоһоонун билиһиннэрдэххэ, Горнайга сэрии сылларын кэмигэр өрөспүүбүлүкэҕэ биир бастакынан Оҕо дьиэтэ арыллыбыт, Ытык Бор диэн сиргэ. Бор — аар-саарга аатырбыт суруйааччылар ини бии Софрон уонна Семен Даниловтар уонна улуу худуоһунньук, академик Афанасий Осипов күн сирин көрбүт, оҕо саастара ааспыт сирдэрэ буолар. Быйыл Бордааҕы Оҕо дьиэтэ тэриллибитэ 80 сылын бэлиэтиир. Бу дьоһун түгэҥҥэ анаан бу испиктээги туруорбутум. Оҕо дьиэтин иитиллээччилэрин уонна сэрии сылларын оҕолорун ахтыыларыгар, харах уулаах кэпсээннэригэр олоҕурбут драма.
Сүүстэ истибиттээҕэр, биирдэ көрбүт ордук, диэн бэргэн этиинэн сиэттэрэн, бука бары Дьокуускай куоракка олорор биир дойдулаахтарбытын, ыалдьыттары сэтинньи 9 күнүгэр Саха Академическай тыйаатырыгар бэйэбит кыыспыт Изабелла Максимова туруоруутугар “Оҕо суола» испиктээги көрөргүтүгэр, сэргииргитигэр ыҥырабыт! Түгэнинэн туһанан, Изабелла Александровнаҕа айар үлэтин аартыга ыраас – сырдык, ситиһии аргыстаах, дьиэ кэргэнигэр или – эйэни баҕарабыт!
Яна Рожина