Саргылаах Саҥа 2024 сылы көрсөр бастакы улахан тэрээһин — улуус Аҕа баһылыгын Харыйата Оҕо саас киинин дьиэтигэр саҕаланна.
Манна үөрэхтэригэр, спорт эйгэтигэр, оскуола олоҕор бастыҥ 40 оҕо ыҥырыллар чиэскэ тиксэн кэллилэр.
Бастатан туран, ыҥырыылаах оҕолорбутугар анаан сомоҕолуур тренинг ыытылынна, ону тэҥэ, бу тэрээһин чэрчитинэн аан бастакытын «Мы будущее Бытантая» гражданскай пуорум буолла. Оҕолор эрдэ талбыт хайысхаларынан бырайыактарын экспертар иннилэригэр көмүскээтилэр.
Харыйа тэрээҺинин саамай кэтэһиилээх, долгутуулаах чааһа «Гарпан» этнокултуурунай кииҥҥэ буолла.
Үгэс быһыытынан, бастыҥ оҕолорбут киэргэнэн-симэнэн, үөрэн-көтөн кыһыл көбүөргэ ыҥырыллан киирэн, намыын ырыаҕа уйдаран вальстаан эргийэ көттүлэр.
Кэрэ үҥкүүлэрин кэнниттэн, улуус баһылыга Иннокентий Стручков хас биирдии оҕоҕо махтал тылларын, эҕэрдэтин этэн туран грамота, анал оҥоһуулаах статуэтка, ону таһынан 5000 тыһ. сууммалаах кэмбиэрдэри бэлэх уунна. Социальнай үлэ салалтатын салайааччыта Саргылана Петрова уонна үөрэҕирии салалтатын салайааччыта Петр Потапов оҕолору бу кэрэ күнүнэн эҕэрдэлээтилэр.
Бу кэннэ, Саҥа дьыл тэрээһинин ыҥырыылаах ыалдьыта Тымныы оҕонньор сиэннэрин Хаарчааналыын уонна Саҥа дьыллыын тиийэн кэлэннэр эҕэрдэлээн, сэмэй бэлэхтэрин туттартаан, бары үөрэн-көтөн уопсай хаартыска түстүлэр.
Маны таһынан оҕолор бэйэлэрин сэмэй бэлэхтэрин, махтал тылларын улуус баһылыгар Иннокентий Стручковка анаатылар.
Салҕыы ыҥырыылаах ыалдьыттары, үөрэнээччилэри эгэлгэ астаах фуршетка ыҥырдылар. Ол кэннэ көрдөөх оонньуулар, үҥкүү-битии буолара күүтүллэр, диэн бу тэрээһини иилээн-саҕалаан ыыппыт Айтал Слепцов уонна Вера Колесова биллэрдилэр.